ភ្នំពេញ៖ ថវិកាចំនួន ២០លានរៀល និងគ្រឿងឧបភោគបរិភាគមួយចំនួនរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ត្រូវបានលោក អ៊ុយ សំអាត នាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជានាថ្ងៃទី០៤ ខែតុលា ប្រគល់ជូនដល់គ្រួសារនៃសពរបស់យោធិនចំនួន ២រូបដែលបានពលីដើម្បីជួយសង្គ្រោះក្មេងលង់ទឹកឲ្យរួចផុតពីជីវិតកាលពីថ្ងៃទី៣០ ខែកញ្ញា ចំណុចអាងអង្ក្រង ឃុំគោគមន ស្រុកបន្ទាយអំពិល ខេត្តឧត្ដរមានជ័យ។
ឆ្លៀតក្នុងឱកាសផ្តល់អំណោយដល់គ្រួសារនៃសព លោក អ៊ុយ សំអាត នាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា ក៏បានពាំនាំសាររំលែកទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនក្រុមគ្រួសារសព និងសូមចូលរួមរំលែកទុក្ខយ៉ាងក្រៀមក្រំជាទីបំផុត ប្រកបដោយក្តីអាឡោះអាល័យ។
ក្នុងសាររំលែកទុក្ខនោះ សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន បានរៀបរាប់ថា មរណភាព អនុសេនីយ៍ឯក ឈន ស៊ីដេត និងអនុសេនីយ៍ឯក វ៉ាន់ ថុល គឺជាការបាត់បង់នូវកូនប្រុសជាទីស្រឡាញ់ប្រកបដោយកតញ្ញុតាធម៌ចំពោះ ឪពុក ម្តាយ ប៉ុណ្ណោះទេ តែក៏ជាការបាត់បង់វីរៈយុទ្ធជនក្នុងវិស័យកងទ័ពពីររូបដ៏អង់អាចក្លាហាន ដែលខិតខំប្រឹងប្រែងជួយសង្រ្គោះជីវិតក្មេងប្រុសលង់ទឹក រហូតបាត់បង់អាយុជីវិតផ្ទាល់ខ្លួន ក្នុងពេលបំពេញភារកិច្ច ដើម្បីបុព្វហេតុការពារប្រជាជន និងប្រទេសជាតិ។
ទាំងកាកបាទក្រហមកម្ពុជា និងថ្នាក់ដឹកនាំ មន្ត្រី យុវជន អ្នកស្ម័គ្រចិត្តកាកបាទក្រហមកម្ពុជាទាំងអស់ សូមឧទ្ទិសបួងសួងសុំដួងវិញ្ញាណក្ខន្ធ អនុសេនីយ៍ឯក ឈន ស៊ីដេត និងអនុសេនីយ៍ឯក វ៉ាន់ ថុល បានចាប់កំណើតក្នុងសុគតិភព កុំបីឃ្លៀងឃ្លាតឡើយ។
គូសបញ្ជាក់ថា យោធិនចំនួន ២រូបដែលបានស្លាប់ក្នុងបេសកម្មជួយសង្រ្គោះក្មេងប្រុសចំនួន ២រូបកាលពីចុងខែកញ្ញាកន្លងមក ត្រូវបាននាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ នាថ្ងៃទី០៣ ខែតុលា ដំឡើងឋានន្តរសក្តិជាអនុសេនីយ៍ឯក ដើម្បីជាការតបស្នងដល់ការលះបង់របស់យោធិនទាំងពីររូបនោះ។
ការបង់បាត់វីរភាពដ៏អង់អាចរបស់យោធិនចំនួន ២រូបនោះ គឺធ្វើឲ្យថ្នាក់ដឹកនាំ និងមហាជនបង្ហាញការសោកស្តាយ និងកោតសរសើរជាខ្លាំង។ មន្ត្រីថ្នាក់ដឹកនាំមួយចំនួន ដូចជាលោកឧត្តមសេនីយ៍ឯក ហ៊ុន ម៉ាណែត បានចូលបុណ្យដល់គ្រួសារនៃសព ដោយគ្រួសារនៃសពនីមួយៗទទួលបានថវិកាចំនួន ១០លានរៀល ហើយក៏មានមហាជនចូលបុណ្យជាច្រើនផងដែរ៕
